Соторутааҕыта Сунтаар улууһугар РФКП Саха сиринээҕи рескомун идеологияҕа секретара, Саха Республикатын Государственнай Мунньаҕын (Ил Түмэн) депутата Петр Аммосов кэлэ сырытта. Кинини Саха Республикатын Государственнай Мунньаҕын (Ил Түмэн) депутата, РФКП Сунтаардааҕы райкомун бастакы секретара Иннокентий Васильев арыаллаан илдьэ сырытта.
Петр Револьдович улуус баһылыгын бастакы солбуйааччы Андрей Никитины кытта көрүстэ. Кэпсэтии сүрүннээн улус социальнай-экономическай туругун тула барда. Кэккэ сонун этиилэр оҥоһулуннулар. Ол курдук, Петр Аммосов бэйэтин баҕа өттүнэн Сиэйэ нэһилиэгин куратора буоларга баҕалааҕын туһунан биллэрдэ.
Салгыы кини улуус кииниттэн чугас сытар Дорбой диэн учаастакка баар «Лоҥкур» бааһынай хаһаайыстыбаҕа сылдьан, үлэни-хамнаһы кытта билистэ. Хаһаайыстыба аҕа баһылыга Александр Поповы кытта ирэ-хоро кэпсэттэ. Билигин хаһаайыстыба барыта 58 ынах сүөһүлээх. Үлэһиттэр миэстэтигэр олорор дьиэлээхтэр, онон атын туохха да арылдьыйбакка, нус-бас үлэлии-хамсыы олороллор эбит.
«Лена» атыы-эргиэн киинин дьиэтигэр РФКП Сунтаардааҕы райкомун икки сыллааҕы үлэтин туһунан отчуоттуур-быыбардыыр конференция буолан ааста. Петр Аммосов кини үлэтигэр кыттыыны ылла. Улуус үгүс нэһилиэктэриттэн талыллан кэлбит делегаттар иннилэригэр партия Сунтаардааҕы райкомун бастакы секретара, Ил Түмэн депутата Иннокентий Васильев отчуоттаата.
Кэнники сылларга Сунтаар коммунистара үгүс тэрээһиннэргэ көхтөөх кыттыыны ылаллар. Олортон сүрүннэринэн Улуу Кыайыы 70 сыллаах үбүлүөйүн тэрээһиннэрэ, Өктөөп күнүгэр факеллаах хаамыы, Комсомол күнүгэр Тойбохойдуур суолга тоһуурга түбэһэн өлбүт буойуттар пааматынньыктарын иннигэр миитин, «Сэрии сылын оҕолоро» общественнай хамсааһын улуустааҕы бастакы конференциятын тэрийэн ыытыы уо.д.а. буолаллар.
Конференция биир саамай сүрүн түгэнинэн билиҥҥэ диэри РФКП Сунтаардааҕы райкомун бастакы секретарынан үлэлээн кэлбит Иннокентий Васильев общественнай ноҕорууската уонна атын үлэҕэ барарынан сибээстээн, райком саҥа бастакы секретарын талыы буолла.
РФКП Саха сиринээҕи рескома бу дуоһунаска маныаха диэри Сунтаар нэһилиэгинээҕи партийнай ячейка бастакы секретарынан үлэлээн кэлбит Трофим Павловы мэктиэлээбитин туһунан Петр Револьдович иһитиннэрдэ.
Аһаҕас куоластааһын түмүгүнэн РФКП Сунтаардааҕы райкомун бастакы секретарынан биир санаанан Трофим Павлов талылынна. Маны сэргэ райком иккис уонна үһүс секретардара эмиэ саҥаттан талылыннылар. Ол курдук, иккис секретарынан Петр Ефремов, үһүс секретарынан Анатолий Семенов талылыннылар.
Петр Аммосов Сунтар улууһугар хас да күн сырытта. Кини Кэмпэндээйи, Уһун Күөл, Тойбохой, Күндэйэ, Сиэйэ уонна Түбэй нэһилиэктэригэр сылдьан, дьону-сэргэни кытта көрүстэ. Сүрүннээн Ил Түмэн үлэтин-хамнаһын туһунан билиһиннэрдэ, дьон-сэргэ кыһалҕаларын кытта билистэ.