Adult Search

Якутский республиканский комитет

Коммунистической партии Российской Федерации

Адрес: Республика Саха (Якутия),
г. Якутск, ул. Октябрьская, дом 3
Телефон: +7 (411) 23-66-151
Электропочта: mgm_2004@mail.ru

Главные

события

классовой

борьбы

Красный Первомай в Якутии: «Хватит терпеть!»
Будем достойными наследниками Победы!

 

Былаас биир партияттан куттанар – Коммунистическай партияттан. РФКП – биһиги уопсастыбабыт сайдар туһаайыытын уларытар, дойдубут урукку модун кыаҕын төннөрөр кыахтаах соҕотох күүс.

Ыраата барбакка, маннык холобур аҕалабын. Кытай Норуодунай Өрөспүүбүлүкэтэ аан дойдуга модун кыахтаах иккис судаарыстыба буолла. Бу орто дойдуга миэстэ хаһан да кураанах турбат. Эстафетаны салҕааччы хайаан да баар буолар. Ол барыта социалистическай сыһыан, коммунистическай теория сүппэт-өспөт аналлаахтарын, ханнык да тутуллааҕар кырдьыктаах, сиэрдээх, киһи аймах сайдыытыгар саамай таһаарыылаах, саамай көдьүүстээх тутул буоларын туоһулуур.

Ол иһин былаас оппозиция буолан кубулунар араас өҥнөөх-дьүһүннээх пропагандистара баар буоллулар, кинилэр Коммунистическай партия туруорар сырдык сыалын-соруктарын эмиэ да былаах оҥосторго дылылар. Ити эрээри билиҥҥи былааһы саралыы тардаллар буолан баран, быыбарга барымаҥ, быар куустан олоруҥ дииллэр, атыннык эттэххэ, былаас салгыы айбардыыр усулуобуйатын олохтуурга ыҥыраллар.

Коммунистическай партия – норуоту баррикадаҕа таһаарыан сөптөөх дьоһун эппиэтинэстээх күүс. Ол эрээри оччоҕуна дойдубут ыһылларыгар тиийэр. Биһиги партиябыт охсуһуу маннык тэҥэ суох, уустук усулуобуйатын аахсыбакка, дойду сайдар кэскилин тосту уларытыы боппуруостарын эйэлээх суолунан, сокуон төрүтүгэр ситиһэргэ суоттанар.

Салайан олорор былаас диктатурата кытааппыт кэмигэр, сирэйэ-хараҕа суох айбардааһын салҕана турдаҕына, ону олоххо киллэрии уустук сорук буолар. Ол эрээри бэлиитикэттэн ыраах сылдьыбыт нэһилиэнньэ үгүс кыһалҕаны көрсөн, эрэйи-муҥу эҥэринэн тэлэн, кини интэриэһиттэн тосту атын толкуйдаах дьон былааска олорорун өйдөөн, бүгүн биһиги диэки буолла. Туспа боппуруос – билиҥҥи былаас “үтүөтүнэн” күн ахсын олох иһин охсуһууттан ордон, үөскээбит балаһыанньаны хайдах баарынан сыаналыыр, олохсуйбут балаһыанньаны бэйэ кыаҕынан уларытарга дьулуһар кыахтарыттан тахсыбыт дьон ахсаана элбэх.

Оттон билигин мин быыбардааччыларым ордук үгүстүк биэрэр үс ыйытыыларыгар хоруйдуохпун баҕарабын.

  • Дьон тоҕо маннык куһаҕаннык олорорун 30 сыл устатыгар өйдөөбөтөхтөрө буолуо дуо? Эһиги, коммунистар, бу сыллар усталарыгар быһыыны-майгыны сиһилии быһаара сатаатыгыт ээ.
  • Дьиҥэр, туох эрэ мэһэй-туорай баар диэн бары өйдөөтүлэр. Атын өттүттэн ыллахха, былаас сүрүн сыалын ситистэ – уопсастыба өйө-санаата төнүннэ, олоҕун бэйэтин кыаҕынан уларытарга дьулуурун сүтэрдэ. “Өй-санаа уостуута” диэн өйдөбүл үөскүүрүн ситистилэр. Манна диэн эттэххэ, уларыта тутуу диэн ааттаммыт кэм саҕаланарыгар биһиги ол туһунан сэрэппиппит: кинилэр сүрүн соруктара – дойдуга өй-санаа уостуута. Ол туһунан митиннэргэ эмиэ аһаҕастык сэрэтэр этибит.

Революцияны романтиктар оҥороллор, үтүөтүнэн сидьиҥ дьон туһанар дииллэрэ – кырдьык. Биһиэхэ эмиэ оннук буолла. Ол эрээри история хаамыыта кырдьыктаах, хас биирдии киһи дьулууруттан уонна өйүттэн-санаатыттан тутулуктанар буолбатах. Уопсастыба сайдыыта халлаан куйаарыттан саҕалаан тулалыыр эйгэ эволюциятын курдук салаллар. Ол иһин биһиги син-биир кыайыахпыт.

Билиҥҥи көлүөнэ бэйэтин эппиэтинэһин өйдүөхтээх, кини эрдэ хамсаннаҕына, мөлүйүөнүнэн дьон олоҕун быыһыаҕа. Ону ааһан ол дьон оҕолорун кэскилин түстүөҕэ. Коммунистическай партия бүгүн туруорар сыала ситиһиллэр уонна олоххо толору киллэриллэр кыахтаах. Дьон өйүн-санаатын уһугуннарарга холбоһуктаах хаҥас күүстэр тустаах үлэни ыытар түбэлтэлэригэр, биһиги Россия бары гражданнарын туһугар Ийэ дойдубут модун кыаҕын кылгас кэм иһигэр чөлгө түһэрэр кыахтаахпыт.

  • Баһаардар тустарынан туох санаалааххыт?
  • Баһаардар саҕаланалларыгар бары көрү-нары туппуттара. Онуоха эбии, демократтар кэлиэхтэриттэн ойуур баһаарын утары охсуһар тиһик сарбыллыбыта. Сэбиэскэй кэмҥэ өрөспүүбүлүкэ ойуур баһаарын авиация көмөтүнэн умуорар тиһигэр аҥардас парашютист-пожарник ахсаана 1200 тиийэрэ. Ону сарбыйан-сарбыйан 2000 сылларга 12 (!) парашютист хаалбыта. Ол аата 100 төгүл кыччаппыттара. Онтон Штыров саҕана бу сулууспаны 120 киһиэхэ диэри улаатыннарбыттара. Син-биир сэбиэскэй кэмтэн 10 төгүл аҕыйах.

Биһиги киэҥ нэлэмэн сирбитигэр ойуур баһаарын авиация көмөтүнэн умуорар элбэх салаалаах бүтүн тиһик баара. Саха сиригэр сертификациялаах 150 аэропорду уонна 300 кэриҥэ авиационнай площадканы оҥорбуттара. Хас биирдиилэригэр авиалесохрана “Ан-2” самолетун сыһыарбыттара. Кэтээн көрөр летчиктар тиһигин быспакка үлэлиир этилэр.

Быйыл бэс ыйыгар баһаардар саҕаламмыттара. Уот ыраах, куттала суох, айылҕа быһыытынан баран иһэр диэн буолбута. Оонньообуттара оҕус буолла – нэһилиэнньэлээх пууннар умайан бардылар. Көрү-нары туппакка, араас презентациялары кэрийбэккэ, уоту умуорарга суһал дьаһаллары тутатына ылыахха баара.

Сэбиэскэй кэмҥэ ыксаллаах быһыыга-майгыга хамыыһыйа мунньаҕа саас ахсын кулун тутарга-муус устарга өрүс уонна гидрометеосулууспа үлэһиттэрэ кыттыылаах буолар этэ. Онно аны сайын навигация уонна ойуур баһаарын өттүнэн хайдах балаһыанньа күүтүллэрин туһунан өрөспүүбүлүкэ гидрометеосулууспатын салайааччытын дакылаатын истэллэрэ.

Оччолорго дьаһаллары эрдэттэн ылаллара: билгэлээһин хайдаҕыттан тутулуктаан программалары ырытан оҥороллоро, ол үтүө түмүктэри биэрэрэ. Быйылгыттан итэҕэһэ суох курааннар буолаллара да, маннык далааһыннаах баһаары таһаарбат этилэр.

2003 сыллаахха Өлүөнэ төрдүгэр забастовка саҕаламмыта, хамнаһы төлөөбөккөлөр, өрүс үлэһиттэрэ өрө турбуттара. Ол кэмҥэ Россия Федерациятын Генеральнай борокуруора Юрий Чайка уолаттара менеджердиир этилэр.

Мин онно тиийэн уустук боппуруостары быһаарарга күһэллибитим. Ханнык да олуйсар, өттөйөр кыахпыт суоҕун үрдүнэн, өрөспүүбүлүкэ бу табыллыбатах менеджердэри туоратары уонна Өлүөнэ төрдүгэр суднолар сырыыларын чөлгө түһэрэри ситиспитэ. Онон ханнык баҕарар балаһыанньаҕа боппуруоһу быһаарыыга хайдах сыһыаннаһаргыттан туох барыта улахан тутулуктаах.

Бүгүн федеральнай былаастан саҕалаан дьону солоҕо анааһын киһи профессиональнай хаачыстыбаларынан буолбакка, кимиэхэ да өйдөммөт “быраабылаларынан” барар. Холобур, соторутааҕыта тыа хаһаайыстыбатын кардиолог Скрынник салайбыта. Киһи сөҕүөн курдук элбэҕи уорбута-сиэбитэ. Билигин итинник биһиги өрөспүүбүлүкэбит туһунан этиэххэ сөп.

Мин үрдүк техническэй үөрэх кыһатын бүтэрбит буоламмын, эдэр эрдэхпиттэн “кыра кылаастаах массыына үрдүк кылаастаах массыынаны салайар кыаҕа суох” диэн өйдөбүллээхпин. Техникэҕэ оннук өйдөбүл баар.

Дьон ортотугар эмиэ оннук. Орто баайыылаах киһи бэйэтинээҕэр үрдүк таһымнаах дьону сөпкө салайар уонна туһанар кыаҕа суох. Ол иһин бастакы сирэй сэлээппэтигэр сөп түбэһэр хамаанда сүүмэрдэнэр.

Толкуйдаан көрүҥ: биһиги бырабыыталыстыбабыт бэрэссэдээтэлэ санаатын сатаан саҥарбат, солбуйааччыта Иркутскайтан үүрүллэн кэлбит киһи. Маннык хамаанда тугу быһаарар кыахтааҕый?

Санатар буоллахха, урут партийнай уорганнарга каадыры кытта үлэ тутаах хайысха буолара, предприятиеларга, учреждениеларга биир киһини уһуннук кириэһилэҕэ олордоору, кими да чугаһаппакка, солбуйар киһи суох дэттэрэр быһыыны-майгыны бохсо сатыыллар этэ. Чунуобунньук кириэһилэҕэ өр олорор бу ньымата оччолорго да баар этэ. Өйдүүгүт? Ол кэмҥэ кини наадалаах киһи аатыран солотугар өр олорор этэ. Билигин бу ньыма дойду таһымыгар туттуллар буолла. Бастакы сирэйдэрбит – турбалара намыһах, онон буруолара да убаҕас, түмүктэрэ да тутах. Оннук буолуохтаах буоллаҕа.

11 № регионнааҕы группаҕа Судаарыстыбаннай дума дьокутаатыгар кандидаттарынан Виктор Губарев, Савва Михайлов уонна Саха сиринээҕи биир мандаттаах 24 № быыбардыыр уокурукка Петр Аммосов буолаллар. Бу дьоһун күүстээх уонна үлэни таһаарыылаахтык ыытар кыахтаах хамаанда.

Виктор Губарев салайааччы быһыытынан инники күөҥҥэ сылдьыахтаах. Билигин Виктор Николаевичка бары өттүттэн кимэн киириэхтэрэ. Мин ону бэркэ билэбин. Биһиги бэрэстэбиитэллэрбитин утары пиар-хампаанньаҕа хайдахтаах курдук кирдээх, сидьиҥ ньымалары тутта сатыахтарын сэрэйэбит!

Госдумаҕа буолаары турар быыбарга кыайар түбэлтэбитигэр биһиги дьоммут аатыгар эрэ дьокутаат аатын сүгүөхтэрэ суоҕа, кинилэр Коммунстическай партия бүгүн дойдубут хас биирдии олохтооҕор туһаайар “Норуот былааһыгар уон хардыы” программатынан салайтарыахтара.

  • Эсер Тумусовка, ЛДПР-га уонна коммунистар куоластарын хайытар санааттан Кремль тэрийбит бытархай партияларыгар куоластаары сылдьар дьоҥҥо тугу этэҕит?
  • Былаас тутаах сыалын ситиспитэ – Сэбиэскэй былааһы эспитэ. Аллен Даллес Сэбиэскэй Союһу эһэр программатын өйдүүргүт буолуо. Ол программа элеменнэрэ баччааҥҥа диэри салгыы үлэлииллэр.

Туох барыта атыыланар, туох барыта атыылаһыллар. Сидьиҥ быһыыны ньымсатык туттунуу курдук тупсаран көрдөрөллөр, о.д.а. Бүгүн бил баһыттан сытыйарын көрөн олорор нэһилиэнньэ киэҥ араҥатыгар, сорох дьон ортотугар хайдах эмит гынан элбэҕи “баһан ылар” өй-санаа дэлэйдэ. Аатырар американскай ыра санаа – биир охсуунан барытын баһан ылыы уонна хаалбыт олоххо кыһалҕата суох олоруу. Дьиҥ олоххо оннук буолбат.

Федот Семенович – урут да, билигин да түөкүн, сымыйаны туттарааччы. Ааспыт өттүгэр өрөспүүбүлүкэтин харыстаабакка уорбута-халаабыта, билигин оннук быыбардааччыларын албынныыр-түөкэйдиир. Быыбар ахсын кинилэргэ үгүһү-элбэҕи оҥоруох буолан тылын биэрэр. Мин кини биэрбит тылыттан тугу эмит толорбутун туһунан эбэтэр “Миэхэ Федот Семенович оннук туһалаата, маннык туһалаата” диэн ким эмит эппитин баччааҥҥа диэри истэ иликпин – квартира, массыына, атын хамсаабат баайы ылбыт аҕыйах киһиттэн ураты: кинилэр ол туһунан хаһан да кэпсиэхтэрэ суоҕа.

Судаарыстыбаннай дума быыбарыгар турбут кандидаттартан барыларыттан биһиги бэрэстэбиитэллэрбит бастыҥнар диэн мин бигэ санаалаахпын. Биһиги кыайыахпыт диэн эрэнэбин.

Артур Алексеев,

РФКП Саха сиринээҕи рескомун чилиэнэ